Det har det vore. Klokka ti blei eg og ungane henta i båthamna av bror min, og så krusa me over fjorden til sommarhuset. Klokka åtte i kveld satte han oss av i båthamna igjen.

Highlights:

Ei fiskeørn sirkla over øya. Drit i om du har sett slike på tv. Du har sikkert sett dragar og orkar og spiderman på tv også. Ei fiskeørn som sirklar i store bogar, tek nokre slag med vingene og stig, for å sirkle igjen. Rett foran augene på meg. Det var magisk. Som svigerinna mi sa: Den er så stor at du føler den vil noko.

Me bada nakne. Ein etter ein sneik dei vaksne seg ned badetrappa og gleid ned i vatnet. Eg er ein frysepinn og badepyse, men dette var berre fint. På tide å sitere bror min: Det var reboot.

Ungane leika i stranda, fann krabber og bada. Glade born som berre treng tilsyn frå avstand, mens sola steiker på vaksne bikinikroppar. Kjekke born som det er hyggeleg å tusle bort til og oppdage strandreker og stikke fingeren i anemonar saman med.

Grilla fisk i pesto.

Turen over fjorden heim. Eg og fireåringen sat framme i daycruiseren, og betre kan det ikkje bli. Blå kvelving over, glitrande flate kring deg, og bølgane frå danskebåten midtvegs.

Ikkje nokon video. Berre Lou som syng om å vere glade saman.

Advertisements