Om Song for Eirabu

Eg har skrive Song for Eirabu, ei fantasyforteljing over to bøker. Dei to banda, Slaget på Vigrid og Vargtid, kom i 2009 og 2012.
Bøkene er skrivne ut frå eit behov eg sjølv hadde som lesar: Eg sakna skikkeleg episk, norsk fantasy for vaksne, tufta på norrøne myter. Ambisjonen var å skrive drivande god litteratur, samstundes som alt eg likte med fantasy skulle puttast inni. Sverdslag og spådommar om verdas ende, eit vell av gode røvarhistoriar, tvil og skjebnevalg, sex og blod, ulvar og norrøne gudar, og minst ein drake.

Ein ganske stormannsgal plan, og heldigvis har verda tatt godt i mot Eirabu.

Denne bloggen blei elles oppretta som ein stad eg kunne øve meg på å skrive nynorsk, nettopp for å kunne skrive Eirabu.
Det viste seg nemleg at desse bøkene måtte skrivast på nynorsk. Fordi vikingar og Odin og langsverd. Fordi kjensla av noko gammalt og skikkeleg tøft. Fordi vakkert språk. Fordi Voluspå.

Haugen bok er favorittbokhandelen min på nett, så derfor lenker eg til dei. ❤

Song for Eirabu, Slaget på Vigrid

Song for Eirabu, Vargtid

 

Om Song for Eirabu, bok 2, Vargtid, frå Tiden Norsk Forlag sin katalog:

For at den gamle spådomen om verdas ende skal bli røyndom, har tre søstre blitt avla fram av den eldste volva og den eldste av gudane, utstyrte med vilje og  krefter dei sjølv er uvitande om. Rundt dei sørgjar ulike maktar og skapnader  for at dei skal bli skikka til å gå lagnaden i møte.

I slaget på Vigrid har tusener av menn mista livet, og tilbake på slagmarka står femten år gamle Ragna med eit sverd som har redda kjærasten hennar ut av døden.
Men kva har ho kjempa for, og kven er fienden?
Veslesøstera Berghitte bærer keiserinnakrona i Syrren, og finn trøyst hos ei makt større enn henne, kan hende større enn Ragnas blotsverd.
Djupt i Durinns fjell er Runa, den yngste av søstrene, i ferd med å finne sin eigen plass i spådommen om Eirabus endetid.

Dei får alle vite at ansvaret for gudar og menneske, og verda dei lever i, kviler på deira skuldre. Sogeforteljarane kring dei spinn lagnadstråder tvinna med løgn, sanning og svik. Når siste vers av songen om Eirabu vert sunge, kan tillit vise seg skrøpeleg og dyrekjøpt, men blod kan ein lite på.

Om første boka, Song for Eirabu, bok 1, Slaget på Vigrid:
Song for Eirabu er ei soge om tre kongeriker, to unge søstre, og ein spådom om verda si ende.

Eirabu ligg kring Storhavet, ei verd og ei tid ikkje ulikt nordre Europa i norrøn tid. Søstrene Berghitte og Ragna er vakse opp på ein avsides gard, og jentene har saman leika fram store draumar om å verte dronning og sverdberar, og i leiken har dei fått avgjere verda sin lagnad.
Tusenåret etter Eletiel, då jentene er 14 og 15 år gamle, blir draumane deira til røynd, Berghitte blir sendt til Syrren som brud for den syrrenske kongen, medan Ragna blir blotgydje og sverdberar for kong Brage av Blåinn.
Då kongerika i Eirabu går til krig, står jentene på kvar si side.

Motstridande krefter, politiske og religiøse, verkar i spelet kring jentene. Soger blir fortalt, intensjonar blir halde løynd, og kva som er rett og galt avheng av kva sanning ein trur på.

Soga om Eirabu er tufta på Voluspå, og det sykliske, norrøne verdsbiletet.

Boka er hos dei fleste nettbokhandlarane, og dei anstendige bokbutikkane har den òg.

Haugen bok.

Tanum

Eg har skrive mange postar om skriveprosessen bak boka.

Her er kva pressa har skrive til no.